মনোহাৰী দেৱী কানৈ মহিলা মহাবিদ্যালয়ত ‘এই মাহৰ অতিথি’ অনুষ্ঠানত উদ্যোগী যুৱক অবিনাশ বল্লভ আৰু সিদ্ধাৰ্থ লালুঙৰ বিত্তীয় সাক্ষৰতা সম্পৰ্কীয় ব্যক্তব্য প্ৰদান

—————————————-
ডিব্ৰুগড় : ষ্টাফ ৰিপ’র্টাৰ,২৮ আগষ্ট,২০২৫ : উজনি অসমৰ নাৰী শিক্ষাৰ অগ্ৰণী অনুষ্ঠান মনোহাৰী দেৱী কানৈ মহিলা মহাবিদ্যালয়ত প্ৰতি মাহে নিয়মিতভাৱে অনুষ্ঠিত’এই মাহৰ অতিথি ‘ শীৰ্ষক আজি অনুষ্ঠিত কাৰ্যসূচীত অতিথিৰূপে অংশ গ্ৰহণ কৰে উদ্যোগী যুৱকদ্বয় ক্ৰমে অবিনাশ বল্লভ আৰু সিদ্ধাৰ্থ লালুঙে । অনুষ্ঠানৰ আৰম্ভণিতে মহাবিদ্যালয়ৰ অধ্যক্ষ ড০ অনুপ জ্যোতি ভৰালীয়ে আদৰণী ভাষণ প্ৰদান কৰে। নিজৰ ভাষণত তেওঁ কয় যে,’এই মাহৰ অতিথি’ অনুষ্ঠানৰ যোগেদি ছাত্ৰীসকল উপকৃত হোৱাকৈ প্ৰতিটো মাহতে নিৰ্বাচিত বিশিষ্ট ব্যক্তিসকলক আমন্ত্ৰণ কৰি ছাত্ৰীসকলৰ বাবে পৰিচয় আৰু বাৰ্তালাপ কৰাৰ সুবিধা সৃষ্টি কৰিব খোজা হৈছে আৰু ছাত্ৰীসকলে যাতে নিয়মিত শৈক্ষিক কাৰ্যকলাপৰ লগতে বৃত্তিমুখী মনোভাবেৰে ব্যৱসায়- বাণিজ্যকো বৃত্তি ৰূপে গ্ৰহণ কৰাৰ বাবে আগবাঢ়ি আহে, তাৰ বাবে ইতিবাচক পৰিৱেশ সৃষ্টি কৰা প্ৰয়োজন বুলি ভৱাৰ হেতু আজিৰ এই অনুষ্ঠানৰ আয়োজন কৰা হৈছে। বিশেষ ভাৱে, শেহতীয়াকৈ ষ্টক একচেঞ্জ, শ্বেয়াৰ বজাৰ, অনলাইন ট্ৰেডিং ইত্যাদিত বৈধভাৱে ধন বিনিয়োগ কৰি ধন উপাৰ্জন কৰাৰ যি সুযোগ সৃষ্টি হৈছে, সেই বিষয়ে আমাৰ ছাত্ৰীসকলক অৱগত কৰা প্ৰয়োজন আৰু বিত্তীয় সাক্ষৰতাৰ জড়িয়তে এই ক্ষেত্ৰত থকা সম্ভাৱনা আৰু আশংকাসমূহ মুকলিকৈ আলোচনা কৰা উচিত বুলি তেওঁ মন্তব্য কৰে। অনুষ্ঠানত উপস্হিত থকা দুয়োজন যুৱ ব্যৱসায়ীয়ে আন ব্যৱসায়ৰ লগতে এনে এনে বৈধ ট্ৰেডিঙত লাভ কৰা সফলতা আমাৰ বাবে এক ইতিবাচক বাতৰি বুলি তেওঁ অভিহিত কৰে। অনুষ্ঠানত উদ্যোগী যুৱ ব্যৱসায়ী তথা অনলাইন ট্ৰেডিং প্ৰক্ৰিয়াৰ সমল ব্যক্তিদ্বয় ক্ৰমে অবিনাশ বল্লভ আৰু সিদ্ধাৰ্থ লালুঙে পাৱাৰ পইন্ট উপস্থাপনৰ দ্বাৰা ষ্টক একচেঞ্জ, শ্বেয়াৰ বজাৰ, মুদ্ৰাস্ফীতি, সঞ্চিত ধনৰ উপযুক্ত ব্যৱহাৰ ইত্যাদি বিষয়ে ছাত্ৰীসকলক বিতং তথ্য আৰু উদাহৰণসহ বুজাই দিয়ে আৰু কি পদ্ধতি আৰু কৌশলেৰে একোটা কোম্পানী প্ৰতিষ্ঠা কৰিব পাৰি অথবা শ্বেয়াৰ বজাৰত ধন বিনিয়োগৰ জড়িয়তে কি ধৰণে সৎ আৰু বৈধভাৱে ধন উপাৰ্জন কৰিব পাৰি সেই বিষয়ে নিজ জীৱনৰ অভিজ্ঞতা আৰু উদাহৰণেৰে ব্যাখ্যা কৰে। অনুষ্ঠানত মহাবিদ্যালয়ৰ আভ্যন্তৰীণ গুণবত্বা নিশ্চিতকৰণ কোষৰ সমন্বয়ক ড০ অশ্বিনী মাছেকে প্ৰমুখ্য কৰি ভালে সংখ্যক অধ্যাপক – অধ্যাপিকা, ছাত্ৰী আৰু অন্যান্য ব্যক্তিয়ে অংশ গ্ৰহণ কৰে । অনুষ্ঠানটিৰ আঁত ধৰে অনুষ্ঠানৰ সমন্বয়ক, সমাজতত্ত্ব বিভাগৰ মূৰব্বী অধ্যাপক দিপাংকৰ শৰ্মাই।